یاداشتنامەکا لێـکـتێـگەهشتنێ دناڤبەرا زانکۆیا زاخۆ و زانکۆیا مورسیا ل وەڵاتێ ئیسپانیا هاتە ئیمزاکرن
ڕۆژا پێنجشەمبی ڕێکەفتی (٢٠٢٣/١/١٩) شاندێ زانکۆیا زاخۆ، کۆ پێکهاتبوون ژ هەر ئێک بەرێزان (پ.هـ.د. کاروان فەهمی سامی) هاریکارێ سەرۆکێ زانکۆیێ بۆ کاروبارێن قوتابیان و (پ.هـ.د. دیار عبدالکریم سعید) هاریکارێ سەرۆکێ زانکۆیێ بۆ کاروبارێن كارگێرى و دارایى و (پ.هـ.د دلیر عادل) ڕێڤەبەرێ ڕێڤەبەریا دلنیا جورییا زانکۆیێ و (د. نزار عصمت) ڕێڤەبەرێ پەیوەندیێن ناڤدەولەتی، سەرەدانا زانکۆیا مورسیا کرن و ب گەرمی ژلایێ ستافێ زانکۆیێ ڤە هاتنە پێشوازیکرن.
د ڕۆینشتنەکێدا ب ئامادەبوونا سەرۆکێ زانکۆیا مورسیا و هاریکارێ سەرۆکێ زانکۆیێ بۆ کاروبارێن ناڤدەولەتی و چەندین پرۆفیسور و ماموستایێن زانکۆیێ، چەند بابەتێن گرنگ سەبارەت خواندنا بلند و کار و چاڵاکیێن زانکۆیا زاخۆ هاتنە کرن و پاشان یاداشتنامەکا لێکتێگەهشتنێ دناڤبەرا زانکۆیا زاخۆ و زانکۆیا مورسیا ژلایێ (د. کاروان) و سەرۆکێ زانکۆیا مورسیا دا هاتە ئیمزاکرن.
د ئەڤێ یاداشتنامێدا چەندین خالێن گرنگ هاتینە دیارکرن، وەکی لێکگوهارتنا ستاف و قوتابیێن زانکۆیێ، هەروەسا باس ل چەندین پڕۆژێن هەڤپشک کرن کۆ دێ دناڤبەرا هەردوو زانکۆیاندا هێنە ئەنجامدان.
هەژی گوتنێ یە، شاندێ زانکۆیا زاخۆ بۆ وان باس ل باژێرێ زاخۆ کرن و دیارکرن کۆ چەندین جهێن شینواریێن ل باژێری زاخۆ هەنە، ب تایبەت پرا دەلال کۆ مێژوویەکا دیر و درێژ هەیە و جهەکێ شینواریە، ژبەر هندێ هەروو ئالیا خواست پڕۆژەکێ هەڤپشک ل سەر شینوارێن باژێرێ زاخۆ ئەنجام بدەن د داهاتوو دا.